ဆယ့်နှစ်ရာသီ လူးတား (ဦးယာ) - အချီး
၁။ ဇေယျတုသဗ္ဗမင်္ဂလံ။ ။ ဇမ္ဗူဒီပေ၊ သပြေမြရောင်၊ ဘုန်းခေါင်မြတ်စွာ၊ သစ္စာလေးဆင့်၊ ကြီးမြင့်ရှင်တော်၊ ထွန်းပေါ်နေလ မကလေး။ ။ သောင်းမြေလယ်ရှိ၊ မဇ္ဈိဒေသ၊ သောဠသတွင်၊ လူ့ဘစောထီး၊ ဘုန်းကြီးကြငှန်း[၁]၊ ပလ္လင်နန်းထက်၊ ငါးခန်းမာရ်စစ်၊ ရန်အငြစ်ကို၊ ပယ်လစ်သုတ်သင်၊ ကောင်းကင်ဘဝဂ်၊ အောက်ထက်မကြွင်း၊ လင်းလင်းထင်ထင်၊ သိမြင်တော်မှု၊ ခပ်သိမ်းသူအား၊ မြောပါးလေရာ[၂]၊ သတ္တဝါကို၊ ခေမာသောင်ရိပ်၊ နိဗ္ဗာန်ဆိပ်သို့၊ ကူး(ထိပ်)ကယ်ယူ၊ ပို့တော်မူသည်။ ။ နတ်လူထွတ် ဦးစွန်းတည့်လေ။ ။လယ်ဗွေတည့်စံမြန်း၊ ညောင်တော်နန်း။ ။ ငါးခန်းမာရ်ပျက်ကျေ[၃]။ ။ ကိုးထွေတည့်ဂုဏ်ပေါင်း သုံးဘုံညောင်း။ ။
၂။ အရေပြုပ္ပါ၊ ဂေါယာဂုရု၊ မတုရှောင်သွေ၊ သပြေပင်ကြီး၊ ထိန်ညီးဝင်းရောင် လင်းပြောင်လေ။ ။ ကိုးထွေဂုဏ်တော်၊ မြတ်ဇိနော်လျှင်၊ မိုးပေါ်ပြန်ကြွ၊ တိုင်းတမ္ပတို့၊ တောက်ပ၀င်းဝါ၊ ရံငါးရာနှင့်၊ ညီညာသိကြား၊ ခန့်ထားမှုကုံ၊ ဝိသကြုံကို၊ ရွှေဘုံပြာသာဒ်၊ နဝရတ်ပြိုးပြောင်၊ ကြပ်မဆောင်၍၊ ညီနောင်နှစ်ပါး၊ တည်ထားဧလှိုင်၊ မွှေးကြိုင်နံ့သာ၊ ကျောင်းတော်သာသို့၊ မြတ်စွာဘုန်းတူ၊ စံတော်မူမှ[၄]၊ သစ္စတောင်ထိပ်၊ တံဆိပ်စက်ချ၊ နာဂပန်ထွာ၊ နမန္တာဟု၊ မြစ်သာချောင်းနား၊ ချခဲ့ထားသည်။ ။ နတ်များရှိ ပူဇော်တည့်လေ။ ။ ထိပ်ဗွေတည့်တည်ထား ရာတော်ပွား[၅]။ ။ ရွှေသားမြကျောက်ပေါ်။ ။ ဖူးမြော်တည့်ပန်တောင်း ရှိစုံပေါင်း။ ။
၃။ နှစ်ဆူစကြာ၊ ဒေသစာရီ၊ ဖြန့်ချီဗျာဒိတ်၊ ဘိသိက်ရွှေခွန်း ညွှန်းခဲ့လေ။ ။ သုနာပရံ၊ တိုင်းရပ်ထံသို့၊ ဘုန်းလျှံမြတ်စွာ၊ ကြွရောက်လာသော်၊ သီတာနောက်ဘက်၊ တန့်ကြည်းထက်က၊ မြွက်ခဲ့ကြိုင်မွှေး၊ ကြူးရင့်ပေးသည်[၆]၊ နီးဝေးပေါက်ပြ၊ အာဏာရှသား၊ ရိမဒ္ဒပြည်၊ ဖြစ်မည်အမှန်၊ ညာသို့ဆန်သော်၊ မြဖလ်စိန်ရောင်၊ ရွှေတောင်မင်းဝံ၊ တမ္ပဒီပ၊ တိုင်းချက်မဟု၊ ပန်းရမြင်စိုင်း၊ စစ်ကိုင်းအင်းဝ၊ ရံကြရေညို၊ မြလိုရောင်ပြေး၊ မန္တလေးကို၊ ပေးရွှေဗျာဒိတ်၊ အတိတ်နာဂတ်၊ မင်းမြတ်ရာဇာ၊ စကြာမင်းတုံး၊ ဇမ္ဗူလုံးကို၊ အုပ်ဖုံးတေဇာ၊ တန်းခိုးဖြာ၍၊ မဟာအမရ၊ ပူရရွှေပြည်၊ သာမောစည်သည်။ ။ နတ်ပြည်တည့် ယိုးမှားဘွယ်တည့်လေ။ ။ ဇာနည်တည့် ပျံမြင်း ဆက်သနှင်း။ ။ ခွန်သွင်းထီးတရာ။ ။ တေဇာတည့်ထိန်ဝင်း လေးကျွန်းချင်း။ ။
၄။ တရာထီးဆောင်း၊ ညွတ်ညောင်းဦးတင်၊ ကျိပ်ဝင်ရင့်မာ၊ တေဇာဘုန်းပွင့် မှောင်လွင့်လေ။ ။ ရွှေမြေတောက်ထိန်၊ တာဝတိန်သို့၊ နှိုင်းချိန်တမျှ၊ စည်ပင်လှသည်၊ ဘုရာ့းသာသနာ၊ ထက်အာကာက၊ စန္ဒာရွှေလ၊ ထွန်းဝင်းပသို့၊ အမရပူရာ၊ ရွှေပြည်သာသို့၊ စကြာဖြန့်မိုး၊ သိမ်းမြန်းစိုး၍၊ တန်းခိုးတေဇော်၊ ဘုန်းတော်နေဝန်း၊ လေးကျွန်းသခင်၊ စောနတ်သျှင်လျှင်၊ သိုက်ဝင်ငါးချက်၊ ဗျာဒိတ်ထွက်နှင့်၊ သက္ကဒေဝါ၊ ညီညာကြပ်မ၊ ကမ်းစသီဒါ၊ မင်းဝံချာတွင်၊ လက်ျာစွယ်မြတ်၊ မွေတော်ဓာတ်ကို၊ နေနတ်ဘုန်းတူ၊ တည်တော်မူသည်။ ။ ဇမ္ဗူကျွန်းလုံး ကျော်တည့်လေ[၇]။ ။ မွေတော်တည့်စွယ်ရင်း ထိန်ထိန်လင်း။ ။ ရာမင်းဥသျှောင်ကျင်။ ။ မျက်ရှင်တည့်လျှံတွင်း နေလိုဝင်း။ ။
၅။ တဆယ့်နှစ်လီ၊ ရာသီစကား၊ လူးတားသံချို၊ မြွက်ဆိုကြူးချည် မြူးချည်လေ[၈]။ ။ ဆန်းထွေကိုယ်စီ၊ လရာသီကို၊ ဘွဲ့ချီမြှောက်ခြီး၊ အသီးသီးဝယ်၊ ယှဉ်မှီးစီလျဉ်၊ စကားစဉ်၌၊ အယဉ်နုကျေး၊ ဆိုရေးဖြာဖြာ၊ လိမ္မာသိမြင်၊ ဆင်ခြင်တွေးဆ၊ စပ်သမျှကို၊ ကောင်းကြသည်ချည်း၊ အနည်းနည်းတွင်၊ ရုံးစည်းသံချို၊ အကျဉ်းဆို၏၊ ထိုထိုမှတ်ဘွယ်၊ လင်္ကာသွယ်ရှင့်၊ အကျယ်စကား[၉]၊ မှတ်သားစရာ၊ သည်လင်္ကာ၌၊ လမှာတခန်း၊ ပန်းကားတသွယ်၊ ကြယ်နှင့်တာရာ၊ နေ့မှာတခြား၊ ဘဝါးနာရီ၊ ရာသီအမည်၊ ဆန်းသည် ဓာတ်ကွက်[၁၀]၊ စက်၏သင်္ချာ၊ ပွဲမှာတလီ၊ ရာသီဆန်းစ၊ ဆယ့်နှစ်လကို[၁၁]၊ ဩဇပျံ့မွှေး၊ စီကုံးကြွေးသည်၊ ချိုအေးသာယာ၊ နာလည်းနာပျော်၊ နားနှင့်တော်အောင်၊ မချော်မချွတ်၊ ချောမွတ်ပြေပြစ်၊ ကောက်ကျစ်မရှိ၊ မြင်သိနားမှာ၊ ဆင်စရာဟု၊ ကြိုင်စွာသင်းကြူ၊ မြတ်ရွှေဂူက၊ မဉ္ဇူရွှေခွက်၊ မွေးပေါင်းဘက်ကို၊ နှစ်သက်ကုန်ကြ၊ စိုင်ရှူးပြသို့[၁၂]၊ တောက်ပ၀င်းဝါ၊ လျှပ်ရောင် ဖြာသည်။ ။ ရာသီဆယ့်နှစ်ခွင်တည့်လေ။ ။ ပြေပြေတည့်ချိုအေး ပန်းသို့မွှေး။ ။ ဆိုရေးဆန်းပလီ။ ။ ရာသီတည့်မှတ်အင်း ဆယ့်နှစ်ကွင်း[၁၃]။
မှတ်ချက်
ပြင်ဆင်ရန်- ↑ ဘုံကြီး ကြငှန်း (ဘ)
- ↑ ပျော်ပါးလေရာ (ဘ)
- ↑ ငါးခန်းမာရ်မျက်ကြွေ (ဘ)
- ↑ ပြန်တော်မူမှ (ဘ)
- ↑ ထိပ်ဗွေတည့်တင်ထား ရာထောင်ပွား (ဘ)
- ↑ ကြူးရင့်အေးသည် (ဘ)
- ↑ ဇမ္ဗူသောင်းလုံး ကျော်တည့်လေး (ဘ)
- ↑ မြွက်ဆိုကျူးကြည့် ထူး၏လေ (ဟ)
- ↑ ထိုမှတသွယ်၊ အကျယ်စကား (ဟ)။ ထိုထိုမှတ်ဘွယ် (ဘ)။
- ↑ ဘဝါးနာရီ၊ ရာသီတချက်၊ စက်၏သင်္ချာ (ဟ)
- ↑ ဖွဲ့စာတလီ၊ စုံစီနိုင်မျှ၊ ဆဲ့နှစ်လကို (ဟ)။ ပွဲမှာတီတီ၊ ရာသီဆန်းစ၊ ဆဲ့နှစ်လကို (ဘ)။
- ↑ စိုက်ယူတလျက် (ဟ)
- ↑ ဆိုရေးအသွယ်သွယ်၊ နာဘွယ်တည့် ရွှင်လန်းသာထူးဆန်း (ဟ)
- မူရင်း - ရေနံချောင်း တွင်းစားကြီးဦးဘိုးဂုဏ် လက်ရေးမူ
- [ဟ] - ဟံသာဝတီပုံနှိပ်တိုက်၊ ရန်ကုန်မြို့၊ ၁၉၀၇-ခုနှစ်ထုတ် စာအုပ်မူ
- [မ] - မြန်မာစာညွန့်ပေါင်းကျမ်း၊ တတိယတွဲမူ
- [ဘ] - ဘားနတ်ပိဋကတ်တိုက်ပေမူ၊ ရန်ကုန်မြို့
|
ဤလုပ်ဆောင်မှုသည် ဇန်နဝါရီ ၁၊ ၁၉၂၉ မတိုင်မီ ဖြန့်ချိခဲ့ပြီး ဖြစ်ပြီး ဖန်တီးသူ ကွယ်လွန်ခဲ့သည်မှာ အနည်းဆုံး နှစ် ၁၀၀ ရှိခဲ့ပြီး ဖြစ်သဖြင့် ယခုအခါ တစ်ကမ္ဘာလုံးတွင် အများပြည်သူပိုင် ဖြစ်သည်။ |