တော်ကဆုန် လေးချိုး
ဟေမာန်နွေလှန်လို့ တုံ့ပြန်တော့
ဗွေသဟံ ဝေယန်အုံ့ဆီက
လေပြန်လှုံ့ဆော်ခဲ့ပြီ။
ပင်ပေါ်ထက် ယော်ရွက်ဝါထိန်ဝေနှင့်
ခါဂိမှေသည် တခေတ်တွင်မှ
ညှာလိမ်ကြွေ တမည်သစ်မည်ကြောင့်
အသစ်တွေ ထွေကာစုပါလို့
ပုရစ်ခွေတမာနုမှာကွယ်
ကျေးဥစီစီ။
ခင်တန်းလျှို သပြေပင်က
ရွှေသဇင်သုတ် လေနှောပြန်တော့
နေဝင်လျှင် ဘုတ်တွေ ရောပါလို့
ဘုတ်ရွှေသြရယ်က တွန်သံချီ
ဌာနီနှင့်ကွာဝေး။
ဖန်ခါခါ လမ္ဗရာစည်ဍိဏ္ဍိပေမို့
၀သန်မှာ ဆည်မချိပြီဘူ့
ပူမိသည် မှော်ရဂုံက
တော်ကဆုန် ညောင်ရေသွန်းချိန်မို့
ဖော်မစုံ အောင်မြေကွန်းဆီသို့
လွမ်းလိုက်လှသေး။
|
ဤလုပ်ဆောင်မှုသည် ဇန်နဝါရီ ၁၊ ၁၉၂၉ မတိုင်မီ ဖြန့်ချိခဲ့ပြီး ဖြစ်ပြီး ဖန်တီးသူ ကွယ်လွန်ခဲ့သည်မှာ အနည်းဆုံး နှစ် ၁၀၀ ရှိခဲ့ပြီး ဖြစ်သဖြင့် ယခုအခါ တစ်ကမ္ဘာလုံးတွင် အများပြည်သူပိုင် ဖြစ်သည်။ |