ရက်လခါကျော်-ချီ ရတု
၁။ ရက်လခါကျော်၊ နတ်စက်ပျော်သား၊ မည်ခေါ်သန်ဦး၊ ဝါသို့ကူးက၊ ပျံ့ပျူးမိုဃ်းစည်၊ လျှပ်စက်ခြည်နှင့်၊ ခြောက်ပြည်မက၊ အစိုးရသား၊ သူဇာ့သက်မှတ်၊ မြရည်ဆွတ်၍၊ မွတ်မွတ်လိမ်းချေ၊ ထုံးနေတိုင်းမြဲ၊ သင်းတွဲစိန့်ပြည်၊ စုံခြည်ကွက်ကတ်၊ တုလွတ်မျက်နှာ၊ သိင်္ဂခြယ်သန်း၊ စိန်ပန်းပွင့်ညီ၊ သရီကိုယ်ထည်[၁]၊ ရစ်လည်သတောင်း၊ ပန်းပေါင်းကြိုင်မြဲ၊ အုံးဆင်နွဲလျက်၊ မြခဲတန်းဆောင်[၂]၊ မတော်ခေါင်ကြောင့်၊ လက်ဆောင်ရှိအုပ်၊ ထိပ်ထက်ရုပ်၍၊ ကျွန်ုပ်သာပျော်၊ တိုင်လျှောက်ဖော်အံ့၊ မည်ခေါ်ပတ်ဝန်း၊ သောင်းလုံးမွှမ်းသည်။ ။ ဆံပန်းကေသာမြ တကား။
၂။ မြွက်ဟသာပျော်၊ လျှောက်သည်သော်မူ၊ ရာကျော်ထောင်သောင်း၊ ဘဝပေါင်းလည်း၊ မပြောင်းရွှေရင်[၃]၊ စုံကြချင်ဟု၊ မြေပြင်ပတ်ဝန်း၊ ဇမ္ဗူကျွန်းတွင်၊ ကြော့လန်းရည်တူ၊ တင့်မျိုးဟူက၊ မည်သူမျှ၊ ဘက်မရသား၊အမျာ့းသက်ခန့်၊ နောင်ဘုန်းညွန့်လျှင်၊ မတန့်လွန်ကျူး၊ ဆိုစဦးက၊ ပျံ့ပျူးချိုပြား၊ နာသူနားဝယ်၊ ပျော်ပါးဘွယ်တိ၊ ကြားသော်ရှိလိမ့်[၄]၊ မျက်စိစိတ်ဝမ်း၊ ခွဲခြမ်းထွေပြား၊ ချစ်သူများကြောင့်၊ တိမ်းပါးတွန့်တို့၊ မည်သို့ကျိုးနေ[၅]၊ မရှိလေဟု၊ ရိုသေထိပ်တက်၊ စုံသည်လက်ဖြင့်၊ ငယ်ဘက်ရန်ဝန်း၊ မြွက်ဆိုမှန်းသည်။ ။ စံခန်းလေသာက တကား။
၃။ တွက်ဆရှာသော်၊ သုံးရွေဘော်နှင့်၊ မြဲတော်နေကျ၊ မမှတ်ရတည့်၊ ကျိုင်းမြညိုရောင်၊ ညီများနောင်လျှင်၊ ယုံအောင်ချိုသာ၊ နှုတ်ပျူဟာနှင့်၊ မယ့်မှာလှည်ဖြား၊ ဆိုသည်များကို၊ မှတ်သားပေဘွယ်[၆]၊ သူတို့ဝယ်လည်း၊ သည်နှယ်သို့ချည်း၊ ဝမ်းနည်းမပြေ၊ ကျိုးနေမဲ့ဘိ၊ တွေးခေါ်ရှိ၏၊ မျက်စိစိတ်တွင်၊ လူတို့ထင်ခဲ့၊ သောင်းခွင်ရပ်သူ[၇]၊ နတ်လူညွတ်ခ၊ တောင်းတိုင်းရသည်၊ လောကထွတ်တင်၊ မြတ်ချစ်ရှင်လျှင်၊ ဆံမျှင်မြူရှိ၊ ကြွင်းမဲ့သိလော့၊ ဂတိဖြူထွတ်၊ ကျွန်ုပ်မှတ်ကား၊ လွမ်းဆွတ်ချစ်ပန်း၊ ညှိုးမမြန်းသည်။ ။ ရံဝန်းနေသာစွ တကား။
မူကွဲ
ပြင်ဆင်ရန်
မှတ်ချက်
- [ရ] - နတ်သျှင်နောင်ရတုပေါင်းချုပ် ရန်ကုန်၊ ဟံသာဝတီစာအုပ်တိုက်ထုတ်စာအုပ် မူတည် ရတု
- [မ] - မန္တလေးမြို့ ဟံသာဝတီ ပိဋကတ်ပုံနှိပ်တိုက်ထုတ် စာအုပ်မူ
- တောင်ငူမြို့အနောက် နန်းတော်ရာကုန်း၏ တောင်ဘက်တွင်ရှိသော ရွှေဆံတော်ဘုရားကို ဆိုလိုဟန်တူ၏၊ တောင်ငူရာဇဝင်သမိုင်းတွင် ၎င်းကို မဟာ သီဟ သူရ ဓမ္မရာဇာ တည်သည်ဟု ဆို၏၊ လုံးပတ်သံတောင် (၁၅၄၀) ရှိ၏။
|
ဤလုပ်ဆောင်မှုသည် ဇန်နဝါရီ ၁၊ ၁၉၂၉ မတိုင်မီ ဖြန့်ချိခဲ့ပြီး ဖြစ်ပြီး ဖန်တီးသူ ကွယ်လွန်ခဲ့သည်မှာ အနည်းဆုံး နှစ် ၁၀၀ ရှိခဲ့ပြီး ဖြစ်သဖြင့် ယခုအခါ တစ်ကမ္ဘာလုံးတွင် အများပြည်သူပိုင် ဖြစ်သည်။ |