သိမ်မျိုးစုံမဟာဋီကာ/အဘိယာစက ပြဆိုခန်း
ပုသိမ်ဒိစတြိတ် ငါးသိုင်းချောင်းမြို့နယ်၊ ငါးပိဆိပ်ဆရာတော် ဦးကုသလ၊ မန်ကျည်းလှ ဆရာတော် ဦးကုသလ၊ လေးမျက်နှာ ဆရာတော် ဦးပဏ္ဍိတ၊ ငါးသိုင်းချောင်း ဆရာတော် ဦးဗုဒ္ဓပိယ အစရှိသော မြို့နယ်အတွင်းရှိ ဆရာတော် သံဃာတော် (၄၀၀) ကျော်တို့ ရိုသေစွာ လျှောက်ထားပါသည်။
တောင်သာမြို့ ကျွန်းရွာတောရ ကျောင်းတိုက်ကြီး၌ ပရိယတ် ပဋိပတ်တရားတော်ကို ကိုယ်နှင့်အသက် မငဲ့ကွက်ပဲ ကြိုးစား အားထုတ်ကာ သဒ္ဒတ္ထသင်္ဂဟကျမ်း၊ ထေရီအပဒါန် မဟာအဋ္ဌကထာကျမ်း အစရှိသော ပါဠိဘာသာ ကျမ်းကြီး - ကျမ်းငယ် ပေါင်း (၂၀)ကျော် ဝိနည်းငါးကျမ်း အဋ္ဌကထာမဟာနိဿယကျမ်း, သဒ္ဒါကြီးနိဿယသစ်ကျမ်း, ရူပသိဒ္ဓိနိဿယကျမ်း, သဒ္ဒနီတိနိဿယကျမ်း အစရှိသော မြန်မာဘာသာ ကျမ်းပေါင်း(၂၀ )ကျော်၊ သာသနာ့မျက်မှန်ကျမ်း သာသနာ့တံခွန်ကျမ်း အစရှိသော ဝိနိစ္ဆယကျမ်း ပေါင်း (၄၀) ကျော်၊ တောင်သာ ဝိနိစ္ဆယဖြတ်ထုံး၊ ရေစကြို ဝိနိစ္ဆယဖြတ်ထုံး၊ မလှိုင် ဝိနိစ္ဆယဖြတ်ထုံး၊ စရပ်ကြီး ဝိနိစ္ဆယဖြတ်ထုံး၊ တံတား ဝိနိစ္ဆယဖြတ်ထုံး၊ ဝဲလောင် ဝိနိစ္ဆယဖြတ်ထုံး၊ အစရှိသော တရားသူကြီးတို့ ဖြတ်ထုံး ကျမ်းပေါင်း (၁၄) ကျမ်း အားဖြင့် ကျမ်းပေါင်း (၉၀) ကျော်၊ ဆယ် ကျောင်းရေး ပေ -အင်္ဂါ (၃၇၀) ကျော် စီရင်ရေးသားတော် မူသဖြင့်၊ မြန်မာနိုင်ငံတော်ကို အစပြု၍ ဇမ္ဗူဒီပါ တစ်ကျွန်းလုံး ပရိယတ် ပဋိပတ် ဂုဏ်ထူးဝိသေသ ကြီးမားတော်မူသဖြင့်၊ ကမ္ဘာအလုံး အလေးအမြတ် ပြုခြင်းကို ခံတော်ရသော၊ အင်္ဂလန်ပြည်ကြီးအရှင် ဂျော့ဘုရင်ဧကရာဇ် မင်းမြတ်သည် ကပ်လှူတော်မူအပ်သော အဂ္ဂမဟာပဏ္ဍိတ ဘွဲ့တံဆိပ်တော်ရ မြန်မာနိုင်ငံတော် ဘုရင်ခံမင်းမြတ်နှင့် မဟာ သံဃရာဇာ သာသနာပိုင် ဆရာတော်တို့က လှူဒါန်းချီးမြှင့်တော် မူအပ်သော လေးမြို့ဂိုဏ်းချုပ် ကျွန်းရွာတောရ ဆရာတော် ဟူသော ပထမဘွဲ့တံဆိပ်တော်၊ မြစ်ကွေ့ခရိုင် သုဓမ္မာဝင် ကျွန်းရွာတောရ ဆရာတော်ဟူသော တတိယ ဘွဲ့တံဆိပ်တော်အားဖြင့် ရေမြေကိုအစိုးရသော ဘုရင်မင်းတို့ ဘွဲ့တံဆိပ်တော် သုံးထပ်ရ မဟာဝေယျာကရဏိက တိပိဋကဓရ , နာနာဂန္ထကာရက သိက္ခာကာမ ခန္တီသောရစ္စ ယုတ္တမုတ္တဝါဒီ မဟာထေရ်ကြီး ဖြစ်တော်မူသော ကျမ်းဂန်တတ် ကျမ်းဂန်ပြု ကမ္ဘာကျော် ကျွန်းရွာတောရ ဆရာတော်ဘုရားကြီးဘုရား။
ပုသိမ်ဒိစတြိတ် ငါးသိုင်းချောင်းမြို့နယ် ရင်းရှေရွာ၏အနီး ပေါ်တော်မူကျောင်းတိုက်တွင် ဝိသုံဂါမမြေစားခံ၍ ခဏ္ဍသိမ် သမုတ်မည်ရှိရာ ကွင်းစာရေး မောင်တင်ရှိန်သည် မဟာမတ္တမည်သော ရာဇာတွင် ပါဝင်သဖြင့် မောင်တင်ရှိန်ထံ အမိန်ခံ၍ သမုတ်မည်ရှိရာ အချို့ ဆရာတော်တို့က ရှေးအထက်ကပင် ကျောင်းဂရမ်မြေကို အစိုးရမင်းတို့က ခွဲဝေပြီးဖြစ်၍ ဝိသုံဂါမ အသီးဖြစ်လေပြီ။ ဒုတိယတစ်ဖန် ၁၂၈၄ -ခု၊ မင်းကိစ္စကို အထက်မှ အမိန့်ရသည့်အတိုင်း စီရင်ပိုင်းခြား ခွဲဝေပေးနိုင်သော မဟာမတ္တ အဝင်ဖြစ်သော ကွင်းစာရေး မောင်တင်ရှိန်ထံအမိန်ခံပြန်ပြီး ဖြစ်သဖြင့် ဝိသုံဂါမ သိမ်သမုတ်သင့်ကြောင်း၊ (သုံး) ဂိုဏ်းချုပ် ခင်မွန် ဆရာတော်ကြီးလည်း သိမ်မြေရှင် ဒါယကာ မောင်မွှေး၏မြေ၌ တိုက်သူကြီး မောင်ချစ်ဖိုးထံ ဝိသုံဂါမခံ၍ သိမ်သမုတ် ဖူးကြောင်း၊ ညောင်ကန်ဆရာတော် ဦးဗုဓ်လည်း ဝတ္ထုကံမြေ၌ ဝိသုံဂါမခံ၍ သိမ်သမုတ်ဖူးကြောင်း သာဓကဆောင်၍ ထိုသိမ် အပ်ကြောင်း ငြင်းခုံကြလေသည်။ အချို့သော ဆရာတော်တို့ကလည်း ဝိသုံဂါမ မြေစားမခံပဲ ၎င်းနယ်အတွင်း သံဃာဟူသမျှ မသိမ်းပဲ သမုတ်အပ်သော သိမ်သည် မအပ်။ ၎င်းအရပ်လေးမျက်နှာ စည်းကမ်းသတ်၍ ဤအရပ်အတွင်းရှိ မြေသည် ဝိသုံဂါမမြေ ဖြစ်စေ ဟူ၍လည်းကောင်း၊ သို့မဟုတ် အသီးသော ရွာသီး နယ်သီး ဖြစ်စေ ဟူ၍လည်းကောင်း၊ ရေမြေကို အစိုးရသောမင်းက ပေး အပ်သော မြေအရပ်သည်သာ ဝိသုံဂါမမြောက်ကြောင်း၊ ရွာနယ်အတွင်းရှိ သံဃာရှိသမျှ မသိမ်းပဲ သမုတ်နိုင်ကြောင်း ရှေးဆရာတော်ဘုရားကြီးတို့လည်း ဤသို့အာကာရနှင့်တကွ မြေပိုင်အစိုးရတို့က ပေးအပ်သောမြေ၌သာ သမုတ်ကြကြောင်း ငြင်းခုံကြလေသည်။
ဤသို့ သူတဖုံ ငါတခြား ငြင်းခုံခြင်းများနေသော သိမ်ဝိဝါဒ အရာဌာန၌ ဆရာတော်သည် ပိဋကတ်ကျမ်းဂန်လည်း ဧကန် ဒိဋ္ဌ တတ်မြောက်တော်မူသည်။ ရှေးကျမ်းတတ် ဆရာတော်ဘုရားကြီးတို့ နည်းနာနယကိုလည်း လက်ဆုပ်လက်ကိုင် အထပ်ထပ် သူတပါးတို့ မတုပနိုင်လောက်အောင် ရတော်မူသည်။ ရှေးဆရာတော် ဘုရားကြီးတို့ သိမ်သမုတ်သည်ကိုလည်းကိုယ်တိုင်ကိုယ်ကြပ် တွေဖူးလှသည်၊ မိုင်းခိုင်း ကျီဝန် မဟာဝိသုဒ္ဓါရာမ မန်လည် စလင်း တကဲ့ပညာရှိ ပုဂ္ဂိုလ်ကျော်တို့၏ တပည့်ရင်းလည်းဖြစ်သည်၊ ပါဠိ , အဋ္ဌကထာ ဋီကာ ဂန္ထန္တရလည်း အောက် အထက်နိုင်ငံတွင် အစုံအလင်ဆုံး ပုဂ္ဂိုလ်ကျော်လည်း ဖြစ်သည်။ ယထာဝါဒီ တထာကာရီ ယထာကာရီ တထာဝါဒီ ယုတ္တမုတ္တဝါဒီ၊ သိက္ခာကာမ၊ ဝိနယဓရ၊ မဟာဝေယျာကရဏိက ပိဋကတ္တယဂုဏ် ပြည့်စုံလှသည်ဟု တစ်နိုင်ငံလုံး ချီးကျူးခြင်းကို ခံရသော ပုဂ္ဂိုလ်ကျော်ကြီး ဖြစ်ကြောင်း၊ တာဝတိံသာ အာသာဝတီနတ်ပန်း ကက္ကာရုနတ်ပန်းပမာ မွေးကြိုင်လှသော ဂုဏ်သတင်းကို ကြားရသည်နှင့် သက်တော် (၈၀ ) ကျော် သိက္ခာ (၆၀) ကျော် ဆရာတော်ကြီးတို့နှင့် တကွ အားပါးတရ မြတ်နိုး အားကိုးလှသဖြင့် ပါဠိ အဋ္ဌကထာ ဋီကာ ဂန္ထန္တရ စုံလင်စွာ အာစရိယဝါဒ စုံလင်စွာ သိမ်သမုတ်ပုံ နည်းမျိုးစုံလင်စွာ ရေးသား၍တပည့်တော်တို့ ပုသိမ်သာသနာတော်ကို ပြုစုချီးမြှင့်တော်မူရန် အလွန် လေးမြတ် ရိုသေစွာ သက္ကစ္စဂါရဝတရားဖြင့် တောင်းပန်ပါကြောင်း အဂ္ဂမဟာပဏ္ဍိတ ဘွဲ့တံဆိပ်တော်ရ လေးမြိုဂိုဏ်းချုပ် သုဓမ္မာဝင် ကျွန်းရွာတောရ ဆရာတော်ဟူသော ဘွဲ့တံဆိပ် သုံးထပ်ရတော်မူသော အတိပါကဋ ကျွန်းရွာတောရ ဆရာတော်ဘုရားကြီးဘုရား။
ဆရာတော် ဦးကုသလအမှူးရှိသော
ဆရာတော်ပေါင်းများစွာတို့လက်မှတ်
၁၂၉၂-ခု တန်ဆောင်မုန်းလ